నితిన్ నబీన్ కు చంద్రబాబు, పవన్ కల్యాణ్, నారా లోకేశ్ శుభాకాంక్షలు
బీజేపీ జాతీయ వర్కింగ్ ప్రెసిడెంట్గా నితిన్ నబిన్ నియామకం
ఆయనకు శుభాకాంక్షలు తెలిపిన సీఎం చంద్రబాబు నాయుడు
పవన్ కల్యాణ్, నారా లోకేశ్ నుంచి కూడా అభినందనలు
నితిన్ నియామకంతో ఎన్డీఏ మరింత బలపడుతుందని నేతల ఆకాంక్ష
భారతీయ జనతా పార్టీ (బీజేపీ) నూతన జాతీయ కార్యనిర్వాహక అధ్యక్షుడిగా (వర్కింగ్ ప్రెసిడెంట్) నియమితులైన శ్రీ నితిన్ నబీన్కు ఆంధ్రప్రదేశ్ ముఖ్యమంత్రి చంద్రబాబు, ఉప ముఖ్యమంత్రి పవన్ కల్యాణ్, మంత్రి నారా లోకేశ్ శుభాకాంక్షలు తెలిపారు. ఈ మేరకు వారు తమ అభినందన సందేశాలను తెలియజేశారు. ముఖ్యమంత్రి చంద్రబాబు స్పందిస్తూ, “బీజేపీ జాతీయ వర్కింగ్ ప్రెసిడెంట్గా నియమితులైన శ్రీ నితిన్ నబీన్కు నా హృదయపూర్వక అభినందనలు. ఆయన పదవీకాలం విజయవంతం కావాలని ఆకాంక్షిస్తున్నాను,” అని పేర్కొన్నారు. ఉప ముఖ్యమంత్రి పవన్ కల్యాణ్ కూడా నితిన్ నబీన్కు శుభాకాంక్షలు తెలిపారు. “బీజేపీ జాతీయ కార్యనిర్వాహక అధ్యక్షుడిగా నియమితులైన నితిన్ నబీన్కు హృదయపూర్వక శుభాకాంక్షలు. బీజేపీ యువమోర్చాలో సేవలు అందించిన ఆయన, బీహార్ రాష్ట్ర రాజకీయాలు, ప్రజా జీవితంలో చురుకుగా ఉన్నారు. ప్రస్తుతం ఆయన ఆ రాష్ట్ర కేబినెట్ మంత్రిగా బాధ్యతలు నిర్వర్తిస్తున్నారు. ప్రధాని మోదీ, కేంద్ర హోంమంత్రి అమిత్ షా, బీజేపీ జాతీయ అధ్యక్షుడు జేపీ నడ్డా ఎన్డీఏను బలోపేతం చేశారు. ఆ స్ఫూర్తిని నితిన్ నబీన్ మరింత ముందుకు తీసుకెళ్లాలని కోరుకుంటున్నాను,” అని పవన్ కల్యాణ్ తన సందేశంలో వివరించారు. ఏపీ ఐటీ, విద్యాశాఖ మంత్రి నారా లోకేశ్ కూడా సోషల్ మీడియా వేదికగా స్పందించారు. “బీజేపీ జాతీయ వర్కింగ్ ప్రెసిడెంట్గా నియమితులైన నితిన్ నబిన్ గారికి హృదయపూర్వక అభినందనలు. ఈ ముఖ్యమైన బాధ్యతను స్వీకరిస్తున్న ఆయనకు నా శుభాకాంక్షలు” అని పేర్కొన్నారు. ఈ సందర్భంగా ఎన్డీయే కూటమి బంధంపై లోకేశ్ విశ్వాసం వ్యక్తం చేశారు. జాతి నిర్మాణం కోసం ఎన్డీయే కూటమి యొక్క సమష్టి నిబద్ధత ముందు ముందు మరింత బలపడుతూనే ఉంటుందని ఆయన తన సందేశంలో స్పష్టం చేశారు. మిత్రపక్ష నేతకు కీలక పదవి లభించడం పట్ల లోకేశ్ హర్షం వ్యక్తం చేశారు.
