శేషవాహనంపై దర్శనమిచ్చిన శ్రీ జ్వాలా నరసింహుడు
వైభవంగా జరుగుతున్న బ్రహ్మోత్సవాలు…
శేషవాహనంపై దర్శనమిచ్చిన శ్రీ జ్వాలా నరసింహుడు…
ఆళ్లగడ్డ , మార్చి 12, (సీమకిరణం న్యూస్) :
ప్రముఖ వైష్ణవ క్షేత్రమైన అహోబిలం లో బ్రహ్మోత్సవాలు అంగరంగ వైభవంగా జరుగుతున్నాయి. ఎగువ అహోబిలం శ్రీ లక్ష్మీ నరసింహ స్వామి ఆలయంలో జరుగుతున్న బ్రహ్మోత్సవాల కార్యక్రమంలో భాగంగా ఐదో రోజు శ్రీ జ్వాలా నరసింహ స్వామి శ్రీదేవి, భూదేవి అమ్మవార్లు శేష వాహనంపై భక్తులకు దర్శనమిచ్చారు. ఉత్సవమూర్తులను ప్రత్యేకంగా అలంకరించి పూజలు నిర్వహించిన అనంతరం వాహనంపై కొలువైన స్వామి కి గ్రామోత్సవం నిర్వహించారు. అహోబిల మఠం 46వ పీఠాధిపతి శ్రీ వన్ శఠగోప రంగనాథ యతీంద్ర మహాదేశికన్, జిపిఎ సంపత్ ఆలయ ఈవో బి నర్సయ్య ఆధ్వర్యంలో బ్రహ్మోత్సవాలు వైభవంగా జరుగుతున్నాయి. మధ్యాహ్నం ఉత్సవమూర్తులకు అభిషేకం నిర్వహించారు. రాత్రి శ్రీ జ్వాలా నరసింహ స్వామి, శ్రీదేవి, భూదేవి అమ్మవార్లను ప్రత్యేకంగా అలంకరించి చంద్రప్రభ వాహనంపై ఆశీనులను చేసి గ్రామోత్సవం నిర్వహించారు. దిగువ అహోబిలంలో ప్రహ్లాద వరద స్వామి, శ్రీదేవి, భూదేవి అమ్మవారు శ్రీ యోగా నరసింహ గారుడ విమానంలో కొలువుదీరి భక్తులకు దర్శనమిచ్చారు. అనంతరం మాడ వీధుల గుండా గ్రామోత్సవం నిర్వహించారు. గ్రామోత్సవం లో భాగంగా అహోబిల మఠం చేరుకున్న ఉత్సవ పల్లకి అహోబిల మఠం 46 వ పీఠాధిపతి శ్రీ వన్ రంగనాథ యతీంద్ర మహాదేశికన్ స్వామి శ్రీ యోగా నరసింహ గరుడ విమానం పై కొలువుదీరిన స్వామి అమ్మవార్లకు ప్రత్యేక పూజలు నిర్వహించారు. రాత్రి ఉత్సవమూర్తులను హనుమంత వాహనంపై కొలువు ఉంచి గ్రామోత్సవం నిర్వహించారు.
